23／7／25尾兔仔

台語聽拍、南渡策室、Nana

1以早有接過「台語聽拍」的工課，外國人發案，結果彼咧Taiwanese是台灣人講華語，知影毋是台語我就無興趣做。這馬我真正接著台語聽拍的工課，配合AI的初稿來改做幼稿，共毋著的改做著的。可比講人講話有腔口差，tiō／tō／tio̍h，hun-hiáng 抑是hun-hióng，連人講毋著去的音嘛愛照實記錄。這个工課沓沓滴滴的代誌真濟，愛chín細膩做。作業系統閣會統計完成的字數、音檔長度佮數量，看彼數字愈來愈濟，感覺chín實在。

明仔載就欲大罷免啊，毋著的就莫閣予伊繼續落去囉。國民黨這兩年的行為實在傷譀古。人若工課無做好，可能會予穡頭路，藍委是家己做得來。向望有上圓滿的結果。

2半個月前去南渡策室開新冊發表會，頭家攏講台語，真舒適、自然的台語環境。

細漢時看著故事主角因為佮別人無仝款hōng討厭，我無啥理解是按怎，後來我才知，家己就是彼个佮逐家無仝款的。講台語嘛是這種感覺，有一寡人聽著台語若像共伊冒犯著：「你是不會講華語，還是你覺得我不會華語。」佇台灣唯一正確的語言就是華語。

南渡策室是足難得的台語空間，有意識去創作一个予台語人的所在。

這馬的菜市仔毋是台語的空間矣，大部份人客攏講華語，生理人當然著愛換一个語言。

會當佇生活中堅持全台語的人，親像是查埔較濟，檢采是in天生就免去配合別人按怎想。

我有時仔佮生份人講台語會膽膽。想著某先生，面抹白粉目彩青色，衫仔punk style，愛我逐工做彼款的打扮是做袂到，佮人講台語抑是英語敢若較簡單，我愛閣較勇敢。到當票前一工，我猶是毋敢問同事敢欲去當票，我的o͘-tó͘-bái有縛同意罷免的布條，伊應該有看著。

31新冊發表會了後，坐火車轉來台中，驚睏去來看刺激的冊提神，閣讀一改《Nana》。

高中時猶未讀《Nana》我就知蓮死去矣。少女báng-kah的真理，絕對愛有女主角。女主角奈奈、蕾拉身軀邊的查埔，攏是可能對象，伊逐个攏共試過一擺，袂輸咧算排列組合。In印證有偌寂寞愛情就有偌緊。

若問我欲共《Nana》佗一个角色交往，頭拄仔想講佮Takumi交往上夢幻。阿泰人好閣正常，若欲幻想當然愛揀一个較痟的。讀甲後來，感覺遮的查埔人攏比袂上娜娜。作品中的同性互動、愛慕，比異性之間理所當然的性慾衝動閣較曖昧。閣讀一改有足濟人物互動，我以早無注意著。仝款的名、生日，是足深的緣份，𪜶彼此膏膏纏，明明知有當傷害別人，落尾嘛是做上害的決定，愛怪就愛怪命運囉。我本底對Vivine westwood的招牌土星無特別佮意，為著《Nana》想欲買一副耳鉤。土星是業力，按呢《Nana》的角色就是業力重，這世人才愛愛甲欲死欲活。

我看上尾的連載是奈奈閣佮阿伸膏膏纏，一點仔進步都無！Takumi佮蕾拉開始咧行，我感覺落尾的劇情袂輸輪迴咧，閣是差不多的桃花債，踅袂出去。自蓮過身了後的安排，無以早的劇情遐媠氣。《天國之吻》較好袂拖拖沙沙，留予人尾韻想真久。講轉來國民黨自中國到台灣，嘛是一點進步都無，若一个政黨無為著眾人，干焦賰個人的利益，按呢干焦是一陣蜈蚣跤、蛤仔手。