2衛生福利部預告欲管制事後避孕藥仔（pī-īn-io̍h-á），以後檢采愛去門診掛號才買會著。

我猶是學生的時陣，食過2改事後避孕藥，一改是意外有性行為攏無準備，另外一改是保險套lak去。食了等來洗來，等甲欲驚死，驚若有身就愛刣死別人家己才會當活。若是連事後避孕藥攏無，我會閣較煩惱慒心。

保險套是plan A，避孕率干焦85%，可能鬥袂好抑是破空。這時事後避孕藥to是plan B。

避胎（phiah-thai）是女性上基本的人權，有法度避胎才有自由的身體。

事後避藥是女性重要的安全保護傘。

我受著的學校性教育，干焦詳細說明保險套使用方法，毋過保險套無遐可靠。講著避免性病干焦保險套有效。避孕方法毋是干焦sak-khù，避孕藥、避孕器簡單講過。人若是有穩定性關係，敢袂當揀別个方法boăi有囡仔？社會對避孕藥仔偏見真重，認為這傷身體，食這無自愛。若是咧食避孕藥仔，閣袂當講是因為想欲避孕，愛講調養身體，查某人刁工欲避孕傷放蕩。「避孕」這个詞就是禁語，有咧避孕嘛無應當坦白講。避孕對查某人來講遐爾重要，近代避孕方法成功發明了後，查某的處境綴咧大大改善。

3這幾年避孕藥仔直直起價，我去鬥蜜蕊娜避孕器。我大學to想欲鬥避孕器，佮序大討論煞予伊笑。伊講我無常識，鬥避孕器足危險足傷身體。害我認為家己真戇才會想欲鬥避孕器，了後我食事前避孕藥仔欲8年。彼陣是2017年，毋過2010年台灣to有人咧使用蜜蕊娜。蜜蕊娜是新型的避孕器，囥佇子宮穩定釋放少量黃體素來避孕，對身體無啥毋負擔，安裝毋免手術佮麻醉。這幾年避孕藥仔價數起誠濟，對3百起甲6百箍。蜜蕊娜會當使用5冬8千箍niâ。

人攏講鬥蜜蕊娜過程誠簡單。醫師那佮我開講那鬥，予我分心莫遐爾痛苦，才開一指（子宮頸開一指，毋是一肢手指入去陰道），我就疼甲欲接載袂牢，無生過囡仔子宮頸較絚。醫師siu̍h一下隨囥好，位置正確誠順利。倒佇診療台無5分鐘就鬥好啊。鬥了腹肚足痠，親像嚴重的生理疼。我足久無這款來洗的痛苦，長期食避孕藥，來洗成做足輕鬆的代誌，無啥毋血嘛袂疼。若是有人來洗足無爽快愛倒眠床幾若工歇睏，建議去予醫生看。醫生無的確會建議食避孕藥仔抑是鬥蜜蕊娜，穩定身體減輕生理痛苦。莫想講這是「查某病」，這款天生的痛苦干焦會當忍耐，今醫療誠發達，莫放棄家己。

行出診所過5分鐘，頭眩目暗，疼甲吐出來。吐出來的物仔有牛奶油芳黃黃的，頂一頓食刺奶omlet。吐了人較輕爽。轉來厝裡，反出誠久無用的水龜焐腹肚，倒咧歇睏，睏一點鐘了後人就好起來袂疼啊。

想想咧我人生中，無啥物驚惶的代誌。以早干焦性予我驚甲無理性，見笑甲毋敢佮人參詳。真無簡單開喙佮人講著避孕器，人煞共我亂教。今鬥避孕器佮以早全無仝矣，若有需要就去做，啥物攏毋免驚，嘛免驚人按怎想，這是家己的身體，家己做主。

「大昨日拄著兔仔，tsa̋ng有鹿，今仔日是你。」我咧散步，有影拄著一隻鹿仔，厝內有兔仔，佮阮伴。

鹿仔蹛市仔內細間厝，毋知敢會足委屈，伊彼躼跤愛大草埔才有夠走。

我想著〈董小姐〉的歌詞，煞著一隻野馬，毋過阮兜無大草埔。

eng暗公視台語台下暗新聞報2條苦毒動物的新聞，害我強欲食袂落去。

若是拄著動物hōng虐待會當通報「Taiwan SPCA 台灣防止虐待動物協會」

2梓冊房辦縛肉粽活動，阿好姊教咱縛肉粽，伊講這米有炒過較芳，縛好閣煠一點鐘。原來中部粽毋是肉粽角，融合南北部優點，食過阿好姊的肉粽了後，我感覺中部粽上好食！

3鹿港魯班公宴台語台5月18拜四下晡新聞有做特別報導，看了chín想欲去，知影魯班公宴幾若年都合袂拄好。今年五月節無tiúⁿ去宜蘭，總算通去看覓。魯班公是公藝祖師爺，咱人五月初七聖誕，魯班公做生日無刣雞刣豬放炮仔，排108桌藝術工藝品，予逐家看桌慶生，誠雅氣。美術館展覽的作品畫占較濟，工藝品誠濟是立體作品，親像神像、竹編、漆藝、瓷仔，囥佇桌頂方便人欣賞，頭前後壁全看會著。逐項物仔都媠氣幼路，袂輸是參加天界盛宴。

去恬事啉飲料歇一下，恬事彼个所在是百年舊厝，邊仔就是摸奶巷，窗仔外的風景是觀光客。阮佮恬事頭家講拄才踅魯班公宴，伊講厝邊就是做法索的師傅有參展。鹿港正經是好所在，民間藝術chín發達。頭家講扒龍船較趣味，鹿港五日節上鬧熱。福鹿溪人𤲍人，橋頂埠岸徛滿滿，下晡到暗時攏有扒龍船。

台灣傳統五日節佮屈原無底代。聽講以早台灣人想著五日節就想著黃巢試寶劍，歌仔戲有搬通人知。黃巢試寶劍，路裡拄著一个婦人人，偝一个囡仔閣拖一个囡仔，伊看了毋甘共講遐有一簇厝，你去遐覕，門前插青，我就袂刣。婦人人報全村的人插青，插艾較勇健，插榕較清閒，插茉避邪，這就是插青保命，了後逐家平安縛肉粽慶祝。五日節欲慶祝逃過災禍，閣有防傳染病，黃酸雨拄煞，天氣漚翕，蠓蟲大量生湠，腸病毒、斷骨熱tn̄g-kut-jia̍t（登革熱）熱天大流行。

今年chín認真過五日節，重新熟似這个節日。

金棗阿媽來講古——黃巢試寶劍

我足佮意讀張瀠文的食譜，伊蹛佇芬蘭。伊5月分享struvor滴粿，佮甜粿足成。芬蘭五月初一Vappu是大節，慶祝勞動節嘛是佮告別寒天。愛啉Sima芬蘭檸檬汽水酒配滴粿。洪明道的專欄【是按怎án-ne生】，寫故事來教科學，淺白閣好看。林麗能〈厝跤ê鳥仔〉咧寫市內四常看著的鳥仔，予我想著蕭平治的《還我台灣鳥仔名》，台灣話講自然我真愛讀，親像咧學地海的真名。陳育萱的〈語言是傳統戲曲ê靈魂〉，講甲真對點，傳統戲劇做囡仔戲改講中文，這是豬頭毋過去顧鴨卵，害咱人話滅亡。台文通訊BONG報愈來愈好看，有評論嘛有趣味代，薄薄一本方便隨身紮隨時讀，嘛有網頁通看，誠適合予人熟似台文。上新的台灣話議題、戲劇、冊全攏有，正經有夠讚。

五日節、Vappu食譜兩篇

滴粿

《還我台灣鳥仔名》

2 逐年熱天都愛啉一杯Match cafe的麻穎牛奶茶。就親像冬節愛食圓仔。

3紀柏論上gâu寫述情詩，比喻美妙，洗盪心靈。《先知》(台文版)逐篇詩開頭攏是有人問先知一个問題，請伊來開破。這馬較少人知影開破這个詞，若毋知開破，毋就執迷不悟慘囉。開破這兩个動詞敆做伙誠有力量，開破了後就欲悟道。我讀過中文版先知，閣來讀先知台文版，台文版譯甲閣較好。西方的哲理讀著生份，譯者蔡緯賢譯甲不止仔在地，親像「有人講甲規畚箕，做無一湯匙」、「彼枝用來安搭你靈魂的月琴。」予人閣較好理解《先知》的道理。

《先知》(台文版)

5／24是聖靈降靈節（Pentecost，也有人講是五旬節），Jeanette Winterson的爸母就是五旬節教徒。台語朋友招我去教會做禮拜，台語囡仔獻詩，聲誠美妙。長老教會的牧師這改講道，特別強調信仰毋是個人的神蹟抑是成功學，是活水的溪。耶穌講：「喙焦的人著來我遮飲。信我的人，照聖經所講：『有活水的溪會對伊的腹內衝出來。』」啉耶穌的水了後就袂喙焦。五旬節教徒顛倒是用成功學，上帝治百病創作神蹟來唌人信教。

我坐佇教會的柴頭椅條想Jeanette Winterson。《正常就好毋免快樂》（Why be happy when you could be normal）這是伊的自傳，夭壽好看。伊回想囡仔時，阿母照三頓共伊蹔，到伊大漢嘛會拍女朋友，伊想通家暴來自不安，伊毋知啥物是愛。講來誠奇妙，上帝疼世人，伊出世佇宗教狂熱的家庭，以早煞無予疼著。

𪜶母寫足濟格言貼厝裡，提醒伊心肝時時有上帝，有一張是「想上帝莫想狗仔。」（Think of God, not the dog.）我才發現狗仔倒頭寫是上帝。（Jeanette Winterson訪問中講伊較倚不可知論（Agnosticism），訪問：Lit from Within）

有人𤆬狗仔來做禮拜，彼狗仔誠乖攏袂亂動，囡仔坐袂牢走甲外口耍，有時仔走入來揣狗仔耍，彼狗仔道理自頭到尾聽透透，狗仔比囡仔閣較認真啊！我相信狗仔會上天堂！

2九月有臺灣月琴民謠祭，五月台灣唸歌節佇台中，月琴歌仔表演遮爾讚著，閣毋免拆票，免費唱予逐家聽，這兩个節逐家毋通錯過，無聽著捶心肝！

今年台灣唸歌節佇舊台中火車頭月台，場地佮表演攏是古早味。我看著足濟佮意的藝人，khá-suh夢幻。頭一工主持是鄭家和，台語台暗時新聞主播，我逐工聽伊報新聞，伊主持較活潑，佮電視足無仝。微微仔笑唸歌團我有聽過in yotube影片，聽著本人唱歌，摻最近政治議題，有人踮厝裡騎跤踏車就有人送錢過來，笑甲欲反去。林宗範來唱牽亡歌，啊伊是人間奇才。楊咩咩老師唱《周成過台灣》，聽伊一个人搬幾若个角色，聽伊罵人誠暢呢。伊彼張面千變萬化，唱歌佮講話差真濟，目頭會曉搬戲。

臺文所必讀張文環〈閹雞〉，小說講著車鼓陣，佗一个研究生有看過？旭陽民俗車鼓劇團，翁仔某答喙鼓，毋捌看過遐活潑閣自然的戲。唸歌節兩工節目真豐沛，我聽甲耳仔覆覆，袂赴去唸歌解籤詩明年閣來去。

3林蔚昀《阮母的寄生蟲》（我媽的寄生蟲）我認為這是台灣上好看的散文。白話閣有結構。逐篇用寄生蟲做意象，蟲的插畫是我看過上古錐的。以早我認為有錢人的囡仔真幸福，上無in過甲誠有面子。以早臺灣人刣雞刣鴨，攏會講：「做雞做鳥無了時， 緊出世做好額人囝兒」後來聽著朋友講in爸母傷愛伊，害伊無法度家己去完成一寡代誌。（）中的心聲有時仔笑出來，有時仔心酸酸。蟲豸大部份愛經過「變態」，大漢佮細漢生甲chín無仝。咱生成是按呢，咱若知影反省，知影家己欠缺--ê，咱攏會當補，變身閣活，活甲閣較媠氣。

我毋捌食納豆。納豆仙人予我足好奇納豆的滋味。這馬納豆是3盒一組，以早日本是6盒一組，以早一口灶是6个人。納豆冷凍保存，欲食前囥冷藏退冰一暝。納豆看著足驚人，黏𣻸𣻸閣小可有味。臭豆腐彼味較重若成物件爛去，鼻慣勢to袂驚。

日本báng-kah看納豆遐濟擺，頭一擺看著猶是驚一下。摻瓜仔哖、烏骨仔（切幼幼形若星）、串仔魚罐頭、唐心卵、蔥仔珠、oa-sá-bih、豆油攪攪咧，納豆的味溫和，有成豆乳。按呢做嘛成poke，食了誠飽，毋知講是佮意抑是討厭，食無慣勢。食食咧，彼siûⁿ-siûⁿ--ê感覺，敢若熟似熟似，真成湯。官能小說袂形容就親像成納豆按呢siûⁿ-siûⁿ--ê--hoⁿh？

《有才調就試看覓》（じゃあ、あんたが作ってみろよ）有做納豆俗麭，後改閣買納豆做看覓。

2菜市仔罕得有賣蕨貓，生甲足成香瓜仔鬚，都愛趁鮮食，囥久koa甲人晡袂loeh。蕨貓嘛𣻸𣻸的，這看著青青--ê較袂亂想。野菜並青菜閣較鮮沢營養的款。熱人時有麻穎食。我愛食苦瓜，麻穎並苦瓜閣較苦，苦甲擋袂牢。麻穎湯我無愛，Match cafe 的麻穎khu-lì-mù我chín愛食，苦苦甜甜帶青草芳。

3英學宇宙的Siâu--ê有去配【童年轉生】夢蝶村:天命未盡【台語音聲】，這是台語成人ASMR廣播劇。我就買來聽，支持Siâu--ê。Handoru 寒濤旅社閣有出【台語音聲×中文字幕】跋筊跋到破產兮我，予烏道大小姐捋潲雕督，這是豐原腔。製作單位做情色劇，閣有甲台語詞表，發明新的台語詞。字幕有白話字通揀。誠用心咧做。我聽這敢若是咧語言學習。

進前有人問我敢有台灣話女性向的聲音作品通看，真可惜無這種作品！這馬男性向較濟，足想欲聽著好聽閣𣻸𣻸ê查埔聲演！

【童年轉生】夢蝶村:天命未盡【台語音聲】

【台語音聲×中文字幕】賭博賭到破產的我，被黑道大小姐榨精調教

1入去飲食店看著電視咧放中天，請趕緊離開，千萬莫坐落來點菜。

進前我去一間越南料理店，電視放中天，菜單有河粉嘛有滷肉飯，台越料理都有，這種店上歹食，我無點to緊出去。

我佮阮伴去食小龍包，暗時七點食暗的時陣，店內無半个人客，中天放甲誠大聲。彼陣枵甲大腸告小腸，頭昏昏腦鈍鈍。我共頭家講欲炊餃佮小龍包，頭家堅持愛畫單仔，啊in就無生理呢，才2項閣會聽毋著？彼中天愈聽愈怪，啊就點好矣毋敢走。搵醬區，豆油、烏醋都油la̍p-la̍p烏趖趖，番薑仔醬無khàm蓋，癩ko甲毋敢去共摸著。炊好送過來，籠床內無洗清氣閣有菜屑仔，烏烏爛爛，我驚討債硬thui，垃圾食垃圾大。轉來厝裡阮攏走腹。放中天的店chín危險，千萬莫食！

2珍蜜排骨便當，寶島少年兄定定講著，去台北路過買來食看莫。

我中晝坐捷運有人買排骨便當，芳甲擋袂牢。珍蜜店內食加80箍，廣播中七號講附近有公園，閣有便利店通買涼的來配。珍蜜生理誠好愛排隊，直直有人入來買便當。彼阿婆就佮節目講的仝款，電話接無停。灶跤無閒𩑾𩑾，便當直直出人隨買走。便當拄做好毋是先予注文的，阿婆先予現場排的。敲電話注文便當嘛是現場等。老歲仔跤手慢，阿婆毋知是逃稅抑是記持無好，愛共伊提醒才有發票，等伊開發票閣愛等一站仔，領便當5分鐘，領發票嘛愛等5分鐘。我足期待食便當提著隨走。

珍蜜排骨便當看著普通普通，糋排骨，炒青菜，滷豆乾，逐項都好食。珍蜜佇電視台邊仔，足濟香港、日本明星指定愛食這，包去飛行機頂食。樹奶敨開，塑膠蓋掀起來，芳氣衝過來，五香粉佮番薯粉做伙糋，正港台灣便當的滋味。排骨酥酥，倚飯彼面潤潤，配飯誠紲喙。食了chín滿足，後改路過閣想欲食。

聽講台北鳥鼠誠濟，我佇公園食排骨便當，驚鳥鼠鼻著佮我搶，佳哉無。

3去市民冊店，進前來看影展無注意著遮有冊店。台北毋捌我，去台北遐濟擺猶是無熟。入去才知是舊厝，壁有一寡所在刁工無油漆，看著古早的紅磚仔。去二樓行踅螺梯，中央有柱仔扞咧誠穩。買夏宇的《比無用更 Less than useless》，我出業2冬攏咧做小工，毋知是useless抑是Less than useless。我佮意〈奇數天發狂偶數天發光〉。

萬事萬物講台灣話，談戀愛房間內當然嘛是，推薦逐家欲「弄被風」，做彼「天地所設ê好戲」，《開花結子》捒來讀，那念氣氛那好，做前戲拄拄好。冊內齣頭百百款。開花毋就是欲受精，原來冊名是這个意思！報逐家頁數：27、114，毋但𣻸𣻸，有影重鹹--ioh !

開花結子Khui-hue kiat-tsí_讀墨ap推書

2二十四節氣5月初5立夏才算熱天，4月初溫度佮熱人差不多。二九暝就聽著石ki-á吱吱叫咧揣伴，今年正經熱。Pong--ê熱甲𤺪𤺪，𤆬伊去剃毛，精神好草加食袂少。聽人講餐巾紙桶窒草就是𨑨迌物，我做予Pong--ê，伊愛耍甲反去。兔仔剃毛勼水一半W

3有一寡人足要意教育部台語漢字有啥毋憑據？憢疑教育部台語亂寫。（教典網頁有說明原則佮委員會人員名單，有興趣通去看）在我來看用佗一个漢字攏會使，台語標準化閣較重要。敢有人去憢疑中文是憑啥按呢寫？中文毋是自倉頡造字彼陣就定落來謼。彼種堅持家己的寫法上著--ê，是咧共台灣話創亂，請莫閣鬥無閒。漢字遮濟字毋知佗一字正確，規氣來寫白話字啦。

有一款人猶未做就放棄，跤步踏差一改，失志跳落萬丈深坑。聽講這款人愈來愈濟，別人欲共伊鬥相共閣揣無人，毋知是覕起來抑是轉去矣。

鱷魚手記佮人間失格有幾若點相仝，手記格式，性格痟狂，驚惶幸福，軟汫鬱悶。鱷魚袚人皮，失去做人的資格。

人間失格中有一个遊戲，共詞分做悲劇佮喜劇，世間大部份的詞是悲劇，少數的喜劇，予人毋知欲笑抑是哭。

隔十年閣讀一改人間失格，台語版氣口誠無仝，譯文順甲若像本成就是台灣話寫的。

是講兔仔共我的人間失格食甲冊皮抾捔，chín人間失格。

2逐工聽阿真的《有美夢上媠》，阿真講伊做電音，向望媽祖進香通放伊的歌，三太子綴咧跳。〈情歌〉親像南無觀世音菩薩遐慈悲。

3去師大演講，Tâigael：祖傳語言與跨文化的翻譯與對話 翻譯與創意書寫工作坊，chín多謝學員報名來參加。我的主題是台語翻譯，用地海太古語來講母語。現場有奇幻小說愛好者，我毋敢講家己讀偌深，奇幻小說有影心適，讀甲誠歡喜。攢梅仔餅送予逐家食，請你食酸酸酸，予你台語講甲真輾轉。台灣話正經是魔法嘛是祝福。

4《為了與你慢步宇宙》出甲第四集。逐家通知的道理，號做「社會常識」，後來我才知影家己真欠缺這款智識，若是有人共常識拆分明寫做一本冊毋知偌好。漫話的主角是竹雞仔小林佮自閉症宇野，兩人成做好朋友，做伙進步解決生活困難。有人講現代囡仔毋知禮數，毋是in無欲學，是無人用in聽有的方式教。讀了溫暖閣予人智慧。

5有人問我「按怎起頭閱讀？」我足細漢就會曉提冊來讀，無人鼓勵嘛無人共我逼。無意中就慣勢讀冊，若硬欲講原因，無人佮我做伴誠無聊，只好去讀冊，愈讀愈有興趣。《十月堂舊書事》畫愛買冊的人客都閉思閉思的款。

6張亦絢來台中演講，我去聽學著真濟物件，閣予伊請，歡喜到地！

我若去信柳原教會，是去予管風琴迷去。美妙無比的體驗。

2名間是台灣茶故鄉，優良農地，好山好水，特殊地形產冬片仔，正經是寶地，南投政府煞欲佇名間起焚化爐！明明就有捌位通揀，刁工來蹧躂名間這遍良地。

茶毋是干焦飲料，聽常行深講才知，台灣手摵茶閣是台灣民族想像的重要元素，講著粉圓奶茶就是咱台灣。原來茶賣予人的是想像，日本茶抹茶賣甲削削叫，日本民族的形象，逐家免講嘛知。咱台灣民族的想像猶茫茫，今真無簡單欲有形影啊。名間鄉起焚化爐毋是單純的環保事件，嘛是政治事件。請逐家關心，支持咱台灣茶。推薦2个相關的podcast訪問。

3 Tâigael：翻譯工作坊，我的課程是4月18日（星期六），標題：譯去佗位去 — — Tâigael台蘇小說來做例。翻譯是語言的旅行，台語翻譯的目的地是翻轉來家己的故鄉，外國譯文翻甲台語氣口愛純，意思毋通走精去。上好的翻譯是你讀甲真順，讀甲袂記這是翻譯冊。毋過故事的設定，煞刁工欲予你讀甲無順，這欲按怎辦？外文翻譯定定拄著人名、地名，閣愛按怎翻才好。我用Tâigael台蘇小說做例，來解說翻譯定定拄著的難題。

Tâigael：祖傳語言與跨文化的翻譯與對話

翻譯與創意書寫工作坊

時間：2026年4月17日（星期五）– 4月18日（星期六）10:00–12:00, 14:00–16:00

地點：國立臺灣師範大學圖書館校區博愛樓705教室（臺北市大安區和平東路一段129號）

名額及參加對象：預計錄取16名學員。凡年滿18歲，歡迎對臺灣文學英譯有興趣之國內外譯者，社會人士及大專院校與研究所在學學生皆可報名，不限國籍。

報名：工作坊免費，採線上報名，入選之學員需全程參加兩日課程。

語言：英文、華文、臺灣台語

https://event.culture.tw/mocweb/reg/NMTL/Detail.init.ctr?actId=60079&fbclid=IwY2xjawQ2LWZleHRuA2FlbQIxMABicmlkETF1clp0S0NERXNnRXh3RlVuc3J0YwZhcHBfaWQQMjIyMDM5MTc4ODIwMDg5MgABHkHKUG4V178MywceT2Am_303UKbOVpbzrlaGs5dIRkEW1Jt_AxAR9dzuftuL_aem_OD0CnwHHDWwNXSgVp8pssw

Thn̂g-thn̂g台語文寫作會友志講，咱台語嘛愛創一个教，分享講台語發生的好代誌，唌逐家加講台語，增加臺語人人數。咱愛有口號親像阿門、阿彌陀佛，箍逐家來信。友志講一个講台語發生的好代誌了後，咱都講：「福氣啦！」咱這个教號做「福氣教」，講台語都有福氣。

一般想著台語敢若誠悲情，是犧牲，是蹧躂，是空喙。福氣啦，予咱嶄然仔無仝的感受。我手頭濟濟工課、好朋友攏是台語牽來的，福氣啦！

陳這講伊講台語才有《鳥語士亂彈》小說出版，無伊本底欲做詩人。（毋過我想這兩層代誌無衝突啦！）這是一本台語長篇科幻小說3／25出版。我讀過其中幾篇讀了誠迷，夭壽的是逐改都斷佇真精彩的所在，親像《如果在冬夜，一個旅人》按呢吊佇遐。講是科幻，《1984》這小說若預言一項一項來發生，科幻是咱對現實的反思。我讀著的故事背景若像是中共占領的台灣，兩个查某囡仔hōng掠去集中營，想辦法欲脫走出海。聽講後來改真濟，毋知這是啥物款的故事呢？ 逐家緊買來看，講鳥語！說鳥語！鳥語說不盡！

2聽著陳芬蘭唱〈無情的火車〉，歌曲清新開闊，原來是來自美國的〈One Way Ticketzz〉，「心內茫茫／頭殼愣愣／吁~一台無情的火車向前去」副歌若像火車khong-lông khong-lông過。陳芬蘭的唱腔聽了印象真深，若司公鈃仔花，甜蜜閣清氣。

3我愛買舊物仔，一是省錢，二是好用閣好看兼特別。臺北文學季開幕活動是「吃土市集」，請作家來排擔，有張亦絢，拄好彼工我欲去臺北。辦佇客家文化公園，我為著這去學客語「幾多錢」佮數字，毋過無講著！彼工我睏3點鐘就欲坐車，規工若咧陷眠，彼工有足濟好甲若夢的代誌。我本底想欲假做一个路人，無想欲佮人盤撋，我想講啊平常時嘛無佮遐的人來往，應該無人會記得我是siáng。去張亦絢的擔仔，伊連鞭就認出我，掠我金金看，我想這時若無相借問無禮貌。用底片相機佮張亦絢合照，毋知相片生按怎？毋過我用目睭共彼工記入心。以早我共人講家己無代誌就咧讀冊，別人感覺按呢chín無聊閣無生產力。寫普魯斯特問卷用著我以早讀的冊，張亦絢呵咾我：「有讀冊喔！」太光榮啊～！我以後繼續認真讀冊。我定期讀張亦絢的雜唸，伊定定引經據典分析文本。做作家毋通干焦感性，理性佮智識嘛要緊。

共作家買物仔，我私心想講彼物仔有魔力，祝福我寫甲長長久久，這是迷信。彼物仔正經媠閣好，來抾俗。我共顏艾玲買2領衫佮真珠編的手指。去崔舜華的擔仔有一个金手環仔誠特別，我戴看覓，彼手環仔若像放大的結婚金手指中央有一粒璇石，戴好了後就敨袂開，閣若像手拷。結婚簡單欲脫身來離緣就無無簡單。伊請我坐落來好好仔研究手環仔的機關，袂當硬挽，角度著才通開。我摸一下手環仔就敨開，這个怪物仔愈看愈佮意，chua̋n共伊買。

2我無愛煮甜的，甜路食傷濟胃慒慒，煮甜的麻煩閣食袂飽。阮伴興甜就予伊煮，圓仔、phû甜粿，這就是年味。難得免家己煮，伴煮的上好食。

3經過南方澳，看googlemap發現漁港邊仔有冊店，伊開欲十年我攏毋知。佈置甲chín有風情，有賣冊嘛有生活用品。可惜踮一下仔就愛來轉，逐家來南方澳海產食到飽，踅春陽號精神充電。

2天氣一下仔涼冷，一下仔燒熱，Pong-pong草食真少，胃口無好，飼伊食菜，伊揀幼的食。盛飼料Pong - ê就食甲suh-suh叫。我逐家佮伊耍食草遊戲，揬草仔枝到伊喙，伊若有心情佮我耍，草含咧大力搝，我草捏牢牢，愛伊喙齒鉸斷才準算，罔晡罔晡伊就有興頭去食草。飼兔仔的趣味就是飼兔仔食草食菜。

3 228欲到矣，推薦逐家來聽《hái！佇遮啦》雞籠外海鬼仔古，比鬼仔古閣較恐怖的故事。

毋知boăi緊，這馬補閣會赴，感恩賈董。

「台灣轉型正義 記憶測驗」98分，有足濟是我自細漢知影的代誌，我是電視囡仔，民視有報林家血案等等。有去過228紀念館，相關紀錄片看過幾若部。我知影的猶是無到，無命屍占大多數。288的受難者欲2萬人。

這个廣告足寫實，節日的客廳就是這个款。無啥話好通講，飯菜嘛無好食，號做親情五十論真是無情無義。到底是按怎愛盤車去到位受折磨。我飼Pong — ê了後就用愛顧兔仔做借口，過年都一个人過清幽自在。

一人一家代，公媽隨人祀，有影是按呢。大部份阿公阿媽過身，這个家就散啊，兄弟姊妹無來往。抑是有人結婚，就換去別位過節。若是人情世事攏毋免陪，通家己揀欲按怎過，我看足濟人欲揀家己過。散赤也有優點，毋驚做毋著就無財產繼承。無人管，隨在家己過。

2參加台語家庭的活動，課表訂台語8成，講師煞直直講華語，華語占甲6成，我聽甲足刺鑿。若是十年前，我會直接kiāu佮講師冤。我想一站仔，想甲講座到一半，想著美妙的辦法，我攑手講：「老師台語講甲遮好，敢會當加講一寡？咱台語活動台語愛占8成呢。」彼个講師聽了猶是無插我。哎，欲聽台語哪會遮難著。文化部補助台語家庭活動，講師是有領講師費咧，請講師自重。民眾拄著這款愛講華語的講師，免佮伊客氣，當場反應，閣無改善就寫批共文化部投。台語活動直直講華語是詐騙。

3妄想代理人是今敏的作品。初看故事紹介，我掠準講親情Jojo彼款替身攻擊。這部作品無遐輕鬆。網路訊息傳播真緊，無影的代誌講甲若有影，落尾正經成做真的，真真假假真惡分辨。逐家閣足愛傳負面、惡質的代誌。

今敏足gâu掠針對女性的惡意，女性受害者講少年攑球棒摃伊，警方煞憢疑伊咧妄想。到第二个受害者是查埔，案件才成立。怪奇的代誌發生啊，犯人死去啊，受害者愈來愈濟，少年球棒親像幻影，無實體的幻影咧刣人，閣隨時隨地犯案。真濟人艱苦甲欲死，向望少年球棒共伊刣死好解脫。人的惡意佮妄想若泉水流無停。逐集若一个夢閣一个夢，其中一集少年球棒共動畫工作室人員全部刣死，順紲紹介動畫人員職務佮工作流程，意外的趣味！閣有網友相招來自殺，少年球棒看著in顛倒驚甲旋走。妄想代理人共無影變有影處理甲真好，謠言害死人，有影。

我足愛孫淑媚，我直直咧想淑媚伊足古錐的。
有一个電影分類叫Tearjerker，意思是人看了誠愛哭，愛哭片。我袂記特對當時、佗一葩開始哭，屎無聲無說著津落來，出戲院面有目屎痕，目睭澀澀紅記記。看著演員哭，我擋袂牢綴咧哭，𪜶哭無鼻水哭甲真媠，我是窒鼻閣毋敢擤驚擤一下傷大聲。料算這部劇一半以上，鼻水一直流，我若一隻魚仔用喙喘氣。哭了傷久，無啥會記得咧搬啥。這齣賣了真好，戲院大間影廳咧放通坐700人，我看早時10點上早彼場，閣有欲一百人來看，真感動！我建議莫親像我下早就來看，哭了無氣力做工課，食暗才來看較好。

2看Pong — ê毛草就知季節咧變，春天欲來啊！兔仔換毛就䆀，舊毛聳聳花花，新毛幼閣烏，兩種色濫糝做伙。舊毛膨膨飛，我衫仔全是伊的毛，我著愛較捷共伊捋毛，予伊換較緊咧。我去兔兔窩，兔友的兔仔都咧換毛，兔仔𪜶敢若同齊講予好勢這陣著來換！

《春天佇陀位》是一塊台語囡仔歌，嘛是囡仔故事冊，閣是一齣台語囡仔劇，由台語共學團的台語囡仔佮家長做伙仔演出。這是台語人對囡仔的愛，歌曲佮故事、畫圖、演戲自頭到尾，攏是家長發揮各自本領合作的成果。《春天佇陀位》m̄-taⁿ囡仔佮意，大人聽著嘛佮意。黃靜雅的歌聲有影媠氣。有一句歌詞講「春天佇陀位／我去問貓咪」，問兔仔嘛有通喔～

3想著一寡長輩，in比我較有文化額（cultural capital），共我關心講哪會無啥物活動。我知影in無歹意，毋過聽著這款話若像嫌我真無路用，無夠拍拚是毋？我後來想通矣，無應該歹勢笑笑予伊過，若共我嫌，就予我錢，予我工課做，邀請我做講座。這就親像親情五十問序細無欲生喔，你就大方共伊討錢來育飼囡仔。過年欲到啊，做序細的莫客氣！

2我足佮意王秀容先生的聲，聽著chín溫柔。公視台語台的全家有智慧定定請伊做顧問，伊笑微微足親切的款，看著伊就歡喜。教育部常用台語辭典的音檔大部份是伊的聲，我聽著佮意定定加放幾若改，就是愛聽伊講話。

我真煩惱家己講台語無端的，講甲tiàu-tiàu。前一站仔共一个生份人鬥相共，愛錄音講話。我有參考新聞台主播按怎講，嘛有共人請教。煞予人退貨三改。對方彼號態度敢若是我應當的，嘛無予我參考的資料，終其尾我就請對方另請高明。這層代誌害我足要意家己的發音，毋知按怎改善才好。

䢢拄䢢spotify推薦《王桑的一工》予我，這是王秀容先生的podcast節目！聽著王秀容先生講台語我就感覺chín幸福，通講我是秀容先生的迷眾。逐集分享電影抑是新聞、文學等等，徛佇女性的角度。主題趣味，先生講道理共人勸共人鼓勵，聽了心情起毛好。節目落尾有台語正音單元，可比講有一集咧講《沼澤謀殺案》，沼澤台語是湳仔地，這字湳làm是合喙音。先生分享鋩鋩角角，按怎講甲媠氣，講幾若个詞有m的音做練習。《王桑的一工》是awesome的一工，王桑嘛是秀容先生的姓，這節目名好記閣有祝福的意思，誠心推薦予逐家。

3《勥跤查某》（花漾女子）二月初一Neftlix下檔。頭拄仔看一這齣劇敢若誠輕鬆夢幻，女主角凱西千金大小姐，蹛佇夢幻別莊夭壽有錢，早時去咖啡廳做小工，暗示變身去酒店為著好朋友報冤仇。背景音樂是流行音樂聽著快活，色調飽滇，親像伊做啥都順風順水。毋過伊心肝內有一个缺，伊的姊妹仔伴佮同學去party啉酒醉予人強姦了後自殺。一个勥跤查某就按呢去了了。伊足後悔彼暝伊無陪姊妹仔去。逐家攏叫伊共姊妹仔伴放袂記，千金小姐伊毋甘願，伊確實有彼號資本佮才調去做到地。

電影放甲一半，一切都遐光明，內容煞是烏暗甲驚死人，閣較恐怖的就是咱攏聽過這款故事，咱知影逐家就是按呢處理這款代誌。「啊查某就是按呢」這款想法害死人，閣害人死目毋願瞌。劇情演出強姦真特別，加害者是查埔囡仔著愛原諒伊前途光明，眾人共伊鬥掩崁。受害的彼查某就是家己無細膩。攏是彼个查某毋著管待伊去死，點破這社會男女性別議題上核心的問題。報冤劇刺激緊張，觀眾通常看甲足暢。這部劇無飼咱食糖蜜，愛咱好好仔看予清楚這是偌爾仔癩ko的代誌。

寒天手冷吱吱，寫字拍字無靈活。影著冊櫥仔有一隻兔仔尪仔，我雄雄想著伊腹肚內是亞麻仁籽，微波了後通做焐燒包，手摸著真緊著燒烙。這是佮繭裹子買的，公平貿易認證的公司。尼泊爾的臭耳聾婦女用布幼仔做尪仔，環保閣會當改善在地人經濟。幾若年前參加交換禮物，才熟似繭裹子，買來送朋友佮家己用。這馬尪仔欠貨，𪜶主要是咧賣衫仔，嘛有揹仔佮帽仔等等。品質好閣有理念我真佮意。

2《宛如阿修羅》是咧講四姊妹仔發現老爸外口有查某人。劇情有時仔沉重有仔緊張，劇中食飯的鏡頭，觀眾看著小歇喘一下。導演是是枝裕和。人做伙就是咧食飯，《橫山家之味》伊共食飯翕甲足有滋味，m̄-taⁿ是食物，閣有那食那講，老母暗飯食食咧開始放唱盤，全家伙仔面頭前講以早翁婿外遇，去愛人兜約會母仔囝徛咧下跤聽著這塊歌。溫馨暗頓就成做恐怖片。

佮伴閣看一改《阿修羅》，舊年我是家己一个人看。料理翕甲足好食款足唌人，彼當陣我都有煮予阮伴食，重看的時想著這層代誌。Eng暗煮壽喜燒，豆腐、苳蒿、金針菇下落去，一鼎豐沛閣好看。牛肉燒燙燙食了誠補。

3烏克蘭的戰爭毋是自2022年才開始，羅西亞早著咧數想。

《向日葵的季節》記錄2014年東部戰爭。作者Igor T. Miecik是波蘭人，譯者是林蔚昀。用作者的家族故事，來了解波蘭、羅西亞佮烏克蘭複雜的民族歷史。外媽徛頓巴斯生3个查某囝，in母決定做波蘭人，兩个阿姨一个做羅西亞人，一个做烏克蘭。咱綴著作者去烏國東部康斯坦丁諾夫卡in外媽兜，伊細漢時渡假的所在，到地才發現以早好耍的遊樂園，鬧熱的城市全無矣，這就是戰爭。

閣較早我讀過《企鵝的憂鬱》，作者佇1995年開始寫，蘇聯拄解體。小說氣氛若間諜片，罩霧真厚，神祕人士穿烏裘仔來無影去無蹤。消息就是機密莫問是按怎，四界是謠言，逐人都講無準。彼陣我叫是這是小說世界特殊的氛圍，《向日葵的季節》讀著嘛有這款不思義的感覺，彼大濛霧愈讀就愈清楚。

AP網鍊（讀了若有佮意，用這个頁面買冊通予我趁著回饋金，予我有閣較濟錢買冊，多謝支持。）

向日葵的季節 - 伊戈爾．T．梅奇克 | Readmoo 讀墨電子書
《向日葵的季節》電子書 - 這是心中的風景。這是我們的祖國，我們的烏克蘭...... 「去找我姊姊。」母親說。「...moo.im

食譜閣讀一改，今西藏人普遍用機器絞，果汁機嘛會用得。絞好閣倒轉去鍋仔燙予燒，煮牛奶茶千萬愛注意毋通煮甲滾，按呢牛奶就無芳氣啊！

西藏人酥油茶食鹹的，我感覺干焦鹹味真奇怪，我有下糖佮鹽，調甲鹹鹹甜甜，換西藏人感覺真奇怪。果汁機絞過的牛奶茶滋味特別厚，親像以早食過的牛奶茶敢若水咧，天氣真冷啉一杯足四序。

2定定去的菜市仔，有一擔咧賣走地卵，卵仁卵白分明，卵殼𠕇雞仔食真好的款，品質好價數嘛袂比超市貴。我家己去買的時，頭家問我：「你男朋友哪會無同齊來？」進前有幾改我佮伴同齊出門，拄好愛買菜就來菜市仔。平常時仔我家己一个人來買就會用得，菜嘛無重甲一个人捾無法度。今仔日我貧惰買菜，叫阮伴去，賣卵的講：「論著你來買喔？」按呢講就買予人感覺無爽快。

3《懂也沒用的神祕旅行：小說家金英夏旅行的理由》

佮以早讀過的遊記全然無仝，讀甲誠心適。若講旅行佮寫作有啥物相𫝛，就是若無行到地就毋知。這本冊是旅行的意義啊！（陳綺真的歌聲）

金英夏的小說嘛真好看，伊的語言佮角色的心態，有怪奇、新奇的感覺。

想通嘛無效的神祕旅行

《台灣ê故事 — — 寫予咱ê島嶼系列套書》是用臺文寫臺文歷史，徛佇台灣的角度看歷史。這本冊先請歷史學者寫華語，了後倩翻譯共翻做台語。

以早歷史課本用華語教「佃ㄉㄧㄢˋ 農ㄋㄨㄥˊ 」、「械ㄒㄧㄝˋ 鬥ㄉㄡˋ 」，後來我才發現彼陣台灣無講華語，根本毋是按呢唸，是械鬥hāi-tò͘，是田佃chhân-tiān贌田pa̍k-chhân來做。了解咱的歷史，愛用家己的語言才通看予明。2025年就推薦逐家來讀這套冊。

台灣ê故事--寫予咱ê島嶼系列套書 - 謝艾倫 | Readmoo 讀墨電子書
《台灣ê故事--寫予咱ê島嶼系列套書》電子書 - 這改，咱總算有一部kōo台語文書寫ê台灣史......世界史文脈 x 多物種交陪x 多族群做伙台...moo.im

《Lán ê 島嶼．lán ê 歷史》周婉窈Chiu Oán-biáu先生台語講臺灣史，有一系列廣播節目通聽，周先生講甲精彩，有時仔用小人物的故事，予咱對彼个時代有同感。親像小台的故事，1874年有排灣族少女hōng𤆬去日本「留學」，對「文明」的日本轉來到「野蠻」的部落，害伊鬱卒到死。有一寡代誌咱袂記哩毋知矣，毋過確實發生過，古早的血淚慘案，周先生用聽著足溫柔講予咱聽。予咱對台灣熟似甲閣較深刻。

Lán ê 島嶼．lán ê 歷史

2有人佮意足「水」的節目內容，英學宇宙是上善若水。

我最近足迷聽英學宇宙，韶的佮柏仔主持，攏是臺文所畢業的，用台語開講五四三，練痟話中有豐沛智識。這是台語podcast，毋是彼種小可講台語的節目，九成九講台語，閣會創作新詞。In不時展冊櫥仔，1450精神演講，予我聽甲想欲應著著著著著，講甲真對點！In講遐有的無的害我笑甲欲反過去，運動的時千萬莫聽。韶的有咧做配音，聲音魔術師，有時陣會唱歌，聽伊罵柏仔是這个節目的重點之一。柏仔喙瀾真濟，毋過講話真有水準捌真濟，伊本名陳柏宇，嘛是《台灣ê故事》的臺文翻譯之一，伊閣有一个口座叫「詩予你看si_hoo_li_khuann」（若是捌台語你會笑），內容真硬篤咧翻譯Yeats的詩。敢若是兩个人的節目，韶的定定講著in男朋友、阿姊佮阿爸阿母，閣有柏仔飼的貓仔阿好嘛來鬥鬧熱。

英學宇宙：https://www.facebook.com/inghakutiu/

詩予你看：https://www.threads.com/@si_hoo_li_khuann

In錄2百外集矣，我來推薦幾集真佮意的。

Ep.203 欲食偌飽！：食甲飽鋩角

Ep.205 韶的「尖牙利齒」：我足愛聽韶的唱歌

Ep.07食酒駛車就是白lān！

Ep.156韶的揣姐夫：韶的阿姊上推薦這集！

3 2025聽上濟改的歌是Αφροδίτη，我咧聽的時當做家己就是Αφροδίτη。

1我講台語的時，心肝內小可仔膽膽。佮生份人講話愛做好準備才有勇氣講，愛佮熟似的好朋友才敢放心講。參加「全國台語政策民間會議」了後我開破矣。現此時國語無法律依據無正當性，戒嚴了後就廢除國語法律，社會猶是照慣勢繼續講國語獨尊華語。咱愛較捷講台語，特別是買物仔，聯絡公務機關、大企業，注文高級飯店閣較愛用台語。予人聽著台語。用咱的話共咱服務，這是應當的權利。

阮小弟招我去參加「全國台語政策民間會議」，敢若是一个真嚴肅的會議，到現場了後發現佮我想的全無仝款。Momo主持鬧熱閣活潑，伊聲足古錐，比電視聽著的閣較古錐好聽一百倍。會議內容親民實在好理解。

這馬台灣是獨尊華語的社會，其他本土語言文化都死殗殗。而且閣有一个足特殊的現象，台灣人無講台語才是正常。台語毋taⁿ是一種語言，台語是台灣文化佮認同足重要的筋脈。論華語，中國才是正港的中心，咱拚袂過；論台語，咱台灣就是世界的中心，南洋福建話佮中國福建廈門愛共咱學。若臺灣人連家己的台語攏無愛，呔有可能真心去關心客人佮原住民咧？少數的殖民者按怎統治多數人？In共咱分化，予咱無法度團結。日本時代臺灣人佮台語，本底是咱共同的認同佮共同語。

會議中共咱講目前台語的現狀，咱民眾愛按怎去行動改善。台灣囡仔愛有母語受教權，增加台語學校，目前上蓋重要的是建立台語委員會。台灣講台語的人口上濟，錢煞分著上少，客語佮原住民都有家己的委員會。台語是台灣認同上有效的一條路，阻止中國認知作戰上有效的方法，請速速去連署台語委員會，予台語通代代生湠。

連署要求成立 台語復振委員會

連署網址

https://reurl.cc/Vma5AY

發起單位：台語政策推動聯盟

聯盟成員：台灣公⺠參與協會、李江却台語文教基金會 、台灣台語路協會、臺灣師範大學台灣語文學系、台北市台灣語協會

2夢在海潮那邊，我頭一改看著歌仔戲搬台灣的故事。唐美雲反串演海賊婆，看著心愛的伊掩喙䫌仔咧歹勢，若像少女咧戀愛誠古錐。戲中蔡牽媽搬查埔樣閣搬查某樣，百變海賊各有風情。伊來台灣趁聽消息，準備聯合天地會占領台灣。

歷史上蔡牽媽40外歲過身，編劇疼惜這號傳奇女俠，創作伊的第二人生。一个選擇占領台灣佮清兵相戰早死，另外一个選擇放下屠刀佮翁婿做伙到老。仝一个舞台兩種人生，人袂看甲霧嗄嗄。現代劇場結合投影，帆形布幕對應海賊，巨形唐美雲共咱說分明，𤆬領觀眾穿越時空。

另外一个蔡牽媽閣較重感情，海賊是慾望深重，才會去弄險做賊。落尾海賊領悟佛法，色即是空，空即是色。人若死啥物攏無賰。這段我感動甲目屎含目墘。予我想著看《國寶》上感動的部份，攏是遐的戲中戲，流傳百年的愛恨痴情，台詞講過閣講，牽引心肝內無形的激動。

唐美雲歌仔戲團逐年十二月攏有大戲，謝幕唐美雲佮觀眾約明年來相見，一定愛答應啊！

3《過境》是一匹魚新出版的漫畫，彩色筆配幼路的素描，西藏風景壯麗，媠甲袂曉講。頭起先對白中小可寫著藏人的苦難，牽到落尾才知彼條艱苦的路，猶未行到底。去西藏是一改過境，盤山過嶺到尼伯爾閣過境一改，旅行了後轉去食頭路又閣是過境。我進前就足佮意阿來的《塵埃落定》，寫甲真白話，話句清氣閣簡單，意思是深閣重。最近咧讀《馴羊記》，讀甲真迷。我這世人大概無緣去西藏，讀《過境》用目睭遊覽。

1 我看日本時代劇，有一个感觸，若是無過去就無未來。日本人對家己過去的歷史調查甲清清楚楚才有才調翕。

看《大濛》若像坐時光機轉去過去，原來台灣古早生按呢。台語親像一支鎖匙，佮咱台灣的過去連結，若是劇中角色逐个攏講華語，閣是彼款聽袂著鄉音，這馬台灣人所講的華語，按呢敢會當看口？到現代語言閣變矣，查某囝講華語。這種理所當然，我看著的是語言的死亡。

入去電影院進前我干焦知影這部電影號做《大濛》，電影開頭甘蔗園，查某囡仔捾籃仔送便當。影一下我隨知這欲講白色恐怖，有人咧覕警察伊愛遐早出門送食的。這是過往看過的作品，了解台灣歷史，予我有按呢的直覺。故事是講一个查某囡仔欲去領阿兄屍體，無錢閣路途遙遠，敢若真沉重，代誌困難無望。

料想袂到，有圓滿的結局。時代動亂，查某囡仔煞順利大漢，繼續讀冊，出業做老師，有家庭有孫仔。對照白色恐怖的受難者，銃殺的無命，閣有一條命關十幾年了後孤身一人。無就是佮牢友做伴，一般人無理解𪜶。結尾查某囡仔佮當初共伊鬥相共的人相搪著，這款對照予人心酸酸。《超級大國民》予人哭甲無聲，活人成做墓仔埔。《大濛》予人看甲愛笑閣愛哭，有刺激有殘酷有溫暖，提醒咱這段歷史猶未結束。

2 下晡的鳥仔

〈夕暮れの鳥〉有奇異的魔力，聽袂𤺪。逐工聽十幾擺，有人講重複是愛，《巨人》的歌我上愛這首。第二名是〈僕の戦争〉，攏是神聖かまってちゃん的作品。𪜶的曲足美妙，毋過の子唱甲若破雞筅，我聽袂loeh。𪜶為《巨人》做的兩條歌，歌聲調甲足電音，聽袂出來是の子，顛倒chín好聽。

《巨人》的氣氛佮國際情勢，予我想著第二改世界大戰的日本。自覺比其他國家無落後，拚命研發科技驚綴袂著別个國家。足驚予人侵略不如先發動戰爭。人類驚惶巨人，巨人嘛是。

〈夕暮れの鳥〉聽幾若擺，攏聽無咧唱啥，我閣掠準是德語。去看歌詞才發現是英語歌，斟酌看嘛看無，用google 翻譯共日文轉做英文。到今google 翻譯的日文猶是爛甲欲死看攏無。錯誤的語言，看無的MV，袂輸謎話，猶是遐爾有魅力。

3毋成樣

做幾若个散工，有台語事工，嘛有臨時工，排班的工課，無正式的頭路。閣有無錢的「工課」，這款我就無啥耐心做，看心情做。

我袂討厭簡單單純的工課，總是有人愛去做（我是文學碩士，同事是藝術碩士，阮笑講碩士哪會佇遮做這款工課）。想著別人按怎看，就會感覺家己無應該閣做，應該去揣一个親像碩士的頭路，政府向望碩士月給愛有四萬的款。我有拍拚去揣彼種，一禮拜五工的頭路。我有請人共我鬥看履歷，指點面試，就是揣袂著，敢若是我chín無能。

人生的大栽問：「是按怎我佮一般人差遐濟？」

我毋知欲按怎處理心內的怨恨佮痛苦，遐複雜深刻的情感。真誠甲過份，是欲按怎做才袂過界？我想家己的作品誠毋成樣，結果發現有人愛家己作品的原因，就是愛彼毋成樣的痛苦。

我足討厭做講座，攏寫過矣，閣講嘛無效。這馬毋是出頭的時陣，感覺家己猶未準備好後一个作品。就準閣愛開十年才通共台語練好，我就沓沓仔練。毋管別人按怎看，我就跤踏實地去做。